«Тәуелсіз елдің ұлағатты ұстаздары» педагогикалық ұжымдар көркемөнерпаздары шығармашылығының облыстық фестивалі 2001 жылы азаттықтың 10 жылдығына орай ұйымдастырылған. Ұйымдастырушылар - облыстық білім басқармасы мен білім қызметкерлерінің кәсіподағы болатын. Содан бері ұстаздардың өнер додасына айналған іс - шара 7 рет өтті. Биылғы VІІІ облыстық фестиваль Қазақстандық оқу - ағарту, ғылым және жоғары білім қызметкерлерінің салалық кәсіподағының құрылғанына 100 жыл толуына орай «Білім кәсіподағы: 100 жыл - бір бағыт, бір мақсат, бір мүдде» тақырыбы аясында өтуде. Іріктеудің соңғы гала - концерті Қордай ауданындағы Мәдениет үйінде өтті. Жергілікті кәсіподақ төрағасы Ерұлан Мағзымбеков бастаған қазылар алқасы көркемөнерпаздардың шығармашылық қабілеттерін бағалап, әр жанр бойынша үздік деп тапқандарын дипломдармен марапаттады. Фестиваль ережесіне сәйкес көркемсөз оқу жанрында Айнур Абдулмаксуттың «Жаңғыру - қоңыраудан басталады» атты авторлық шығармасы үздік деп танылып Жамбыл облысы әкімдігінің білім басқармасы Жамбыл облысы оқу - ағарту, ғылым және жоғары білім қызметкерлерінің жергілікті кәсіподағы дипломымен марапатталды.